ابوذیّات ردود العاصفات
احتضر گلبی من الالام نجنج
اصبی العین من القهر نجنج
زمانی بالغدر مندحر نجنج
ابگبر لو دحر گام ایعیل بیّه
...
نزف دمعی علی واعفق وعالی
النایم من سمع صوتی وعالی
مثل طیر الترک وکره وعالی
عفت طیف الیزف ضیمی علیّه
...
عکمص لیل خلّانی وانعله
ضب علب مع العلبط وانعله
الجمل لو ما فرش جدمه و نعله
رکس بارمال عُلق بالوطیّه
...
مجاج النحل حالی ایکون منّک
ممثّل محق بالگبّان منّک
مضن تخفی علینه امخاض منّک
ثری ابعلمک ایفیر اینور ضیّه
...
الفتافت گوطرت بالشمس ولفای
تفتی الرجل گوله ابهجز ولفای
فثج و افثج الفج الحمل ولفای
تفجع فیخمان ابذل خویّه
...
الگیض امحل علی و احتلم بشتای
امضایجنی الحشر ما فاد بشتای
املفلف منحجز و انعدم بشتای
البگ و الحرمس العب طوبه بیّه
...
گمر و ابرج سنانه او غرف چلچل
انهطر جسمه ابرخاوه او علی چلچل
علی اعیونی و اشوف الزلف چلچل
مِعت بحضانه من خیّم علیّه
...
یصایغ صوغ للطیبات ورده
غزال اعیونهن و الطول ورده
اری ابسدره لمیع الدرر ورده
اوزنه ابذهب لو ینطونه الیّه
...
ارکبن و ایلاعب الهودج شعرهن
بنات اجواد و ایخبّل شعرهن
اهاب الحرص توبخنی شعرهن
الخیر اگبل الشیب العم علیّه
...
اگبلت و ابلغ دلیلی من رجلهه
الخلاخل ذهب رنن من رجلهه
تهت معرف ابنهه من رجلهه
تصر بعیونهه او کلفت علیّه
...
الیود الشگر کل العمر ینشل
ابعذاب او ضیم جرحه ابغضب ینشل
حتّی او لو علی التابوت ینشل
اندفن بهمومه و اسراره الخفیّه
...
حدوا دون الموادع ونحبلهم
جفو ریت ابسلامه ونحبلهم
یلوع الگلب یتعب ونحبلهم
اشو ترکونی ما عدهم حمیّه
...
عین التصد لعیونک عملهه
الیضدنی حاور ایذمنی عملهه
تلاگی روحک الخانت عملهه
اذا صادگ تضل وفّای الیّه
...
ابتلینه ابخلگ لا منسب ولادین
ولا سلّفوا کل عاجز ولادین
یحلبون البغل لو در ولادین
او یحیّون السرق باحلی التحیّه
...
العنده اخلاق بالدیوان یرعه
ندی او بحشامه کل اکتار یرعه
النذل ما یسگی العطشان یرعه
جبان او موتته کلّش ردیّه
...
اشعلامک ما تحن و اتزور وتعن
یمر ضچرک علی بالحلم وتعن
تگدر ترکب اکحیلان وتعن
تجی واتشوف وکتی اشعمل بیّه
...
بس کافی العتب والمحب ونهد
نعوف القابچی و الشکر ونهد
الولف ثور الربیع امتثل ونهد
الزمان اویای هیچی ایحود بیّه
...
اللمس رأس الدرر وانفطر ولحگ
سارق حاف نص البلد ولحگ
یالبخدّه زرعت الورد ولحگ
یحرم الشرع بوسات الخفیّه
...
الغرام ایکون بیت الشرع ولحگ
قطاره امرچّب الّی عان ولحگ
اذا تلمس ورد و الثمر ولحگ
یخر و ایطیح و ایعم عالبریّه
...
بطا عنّی الاودّه الگلب ینزار
اعلی شوفه او ریت یوم ابیوم ینزار
لأن زیجه دلع بالعین ینزار
ابفرد نظره یشافی الالم بیّه
...
چویت الگلب نار ابشطب خل بی
او دواوینی مزهیه ابطرب خل بی
کلمن صادقانی ابمکر خل بی
لان محتاط و اسراری خفیّه
...
ابنثر نظمی عرفت اعیار منّی
ولا اعاشر بشر مقتدر منّی
النّاس الحاسده شترید منّی
ابکلام الشین و اترامی علیّه
...
الدهر ضکنی ابگفای النّاس لامت
العگل تیّه له وکت الضیج لامت
العاف الدنیا شنو اغطاه لامت
الچفن و اعماله و افعاله الردیّه
...
و حق من خلق بر او بشر وجّن
او صدقت او ما کذبت اعتقد وجّن
الک نیران وسط الگلب وجّن
او کل ساعه ابسنه فرگاک الیّه
...
شمس وجهه السدر گیمر منلعای
امن اشوفه ترمد اعیونی منلعای
جفانی او تیّهت ضعنه منلعای
اصیح او ما یرد و اسمع هذیّه
...
شدهنی الوکت وکت اصبای شدهن
الالم بعضای زاده الفکر شدهن
ترجّیت الرمانی اجروح شدهن
ترکنی او کثرت الویعات بیّه
...
یحط ایده ابوعد و ایخون یدّای
کسر گلبی ابعذابه اسبلت یدّای
جرحنی ابحچیه والصوبین یدّای
انهجم بیته الّفانی او عم علیّه
...
جاسم ثعلبی (الحسّانی) 18/05/1400
:: برچسب‌ها:
ابوذیّات ردود العاصفات ,
:: بازدید از این مطلب : 1005
|
امتیاز مطلب : 0
|
تعداد امتیازدهندگان : 0
|
مجموع امتیاز : 0
عضو شوید
عضویت سریع
آمار مطالب
آمار بازدید
